[H!MA]

أهلين أبو الفوارس

ردي هنا أمام الجميع راح يكون لسببين
- لحجم صاحب الموضوع ومكانته عند المنتدى
- ولأن الكلام راح يكون موجه للجميع وأولهم أنا

أولا ..
فارس بوليود
أنت كبير ومكانتك محفوظة ومنقوشة بذهب في جدران المنتدى
ودا أمر ما يختلف علية اتنين


تانياً ..
أنا هنا مو عشان أناقش الأمس
لان الأمس كان عبارة عن خلافات طبيعي جدا إنها تقع بين البشر
لانهم مخلوقات غير معصومة من الخطأ
سواء كانوا اعضاء أو إداريين
الرسول صلى الله علية وسلم سبق وأخطأ في الأمور البشرية
ما بالكم أحنا ..


تالتاً ..
وهذا الكلام مخصص للكل وأولهم أنا
لازم يعرف الكل إن جوات كل إنسان وحش
يخرج لمن يتعرض الانسان للاستفزاز والاسائة
فلا تستفزون أخوانكم وأخواتكم وبعد ما يتوحشون عليكم
تجون تشتكون منهم

تروا احنا أخوان وأخوات شئنا أم أبينا
وأغلبنا ما شاء الله راشدين
وتعدوا عُمر المراهقة والهفوات
وأصبحوا أكبر من أنهم يختلفون على أمور تكاد تكون تافهة
وأنا متأكد إنو ما يسعدكم وقوع الخلافات بين أخوانكم
وهنا يجي دور الكل في مسئلة دوام الود بيننا والتفاهم

وحاب أنوه عن نقطة مهمة في الموضوع دا
عزيزي وعزيزتي المتفرجين على خلافات الأعضاء
لمن تلقى عضوين مختلفين حاول تصلح
لا تنحاز لصديقك ولا تحارش بين المتخاصمين وتثير الفتنه
إدا ما قدرت تصلح لا تفتن
لأنك والله راح تكون محاسب عند رب العالمين
ودا الموضوع أنا أحمّل مسؤوليته الكل ومنهم أنا
وان شاء الله اننا مو من القوم الي يقبلون إنو تشيع الفتنه بينهم

سؤال لكل من يقراء كلامي الآن
هل عداوتك لأختك أو لأخوك راح تجلبلك الاحترام ؟
لا والله
الأخلاق الحسنة والتعامل بالمعروف
هي الي راح تخلي الناس يحترمونك


رابعاً ..
نحن كإدارة بمثابة مركز أمني في المكان
وهدفنا حماية المسيء والمُساء إليه
تخيلوا قد أيش المسؤولية الي احنا فيها
وحطوا نفسكم مكاننا
لمن يخطأ أحد من اصدقائك على صديقك التاني وش بتسوي ؟
مالك غير إنك تطبق القانون وبس
وقوانين المنتدى ولله الحمد تندرج تحت القيم الاسلامية

والي يزعل من العدل وتطبيق القانون
يراجع نفسة لانو أكيد راح يلاقي إن الخلل فيه ..

وفي النهاية ..
حاب أوضح نقطة جوهرية يغفل عنها البعض
وهي سبب وجودنا الأساسي هنا
إلي هو التسلية والترفية وتبادل الايجابية .. فقط

لأننا ماراح نستفيد شيء من الخلافات أبداً
بالعكس راح نتضرر
ويقصر عُمر انتاجنا الايجابي في المكان ..

وأخيراً وليس أخراً ..
أنت يافارس بوليود وأمثالك من الأعضاء
قدركم كبييير
ولازم تصرفاتكم تكون مثل قدركم وزيادة
وأنا أوعدكم بإسمي وأسم المديرة والادارة
إنو كنا وراح نكون دائما عادلين بقدر ما يوفقنا الله

وأنا يافارس راح أعتبر وجودك من جديد عودة مو وداع
وقريباً راح تحصل ع لون التميز
إلي تستحقة بجدارة

وكلنا أصدقاء واخوان ..
وإن حصل أختلاف مو معناتو إنو لازم يقع خلاف
وإن وقع خلاف إرجعوا للادارة عشان ما يكبر الخلاف
وأفضل طريقة للتواصل مع الأدارة هي الرسائل الخاصة
أما إذا لجأ أحدكم إلى التشهير وإشاعة الفتنه
فوقتها راح تكون الأدارة هي خصمه مو إلي اختلف معاهم

الإداريين هم خدم لكم
أحسنوا معاملتهم عشان يحسنون معاملتكم ..

هذا وصلى الله على سيدنا محمد د